°ˆ~*¤®§®¤*۩๑۩۞۩๑๑ العلاقة بين معدل التنفس والاجهاد ๑๑۩۞۩๑۩*¤®§®¤*~ˆ°

ايه هو التنفس؟
الكلمة دى معناها تحرير الجسم للطاقة او انتاج الجسم للطاقة عن طريق عملية الاكسدة للقيام بنشاط ما متفقين؟

طبعا طرق عملية تحرير الطاقة دى بتختلف حسب الظروف الواقعة على الجسم او المتغيرات الطارئة عليه فمن الممكن انه يكون التنفس يعنى اكسدة هوائية او لاهوائية او هوائى فى بعض مراحله ثم لا هوائى فى بعض المراحل الاخرى.

طيب اثناء القيام بمجهود بدني ما فأن سرعة التنفس تزداد هذه الزيادة تختلف تبعا لنوع المجهود وكذلك المدة يعنى طريقة التنفس بتختلف فى الجرى لو كان بطيء او سريع لمسافة كبيرة يعنى فترة أطول او لو فترة اقل وهكذا ونروح بقى للموضوع والمفيد


هنقسم المجهود والشدة لنوعين

الاول :- مجهـــود متوسط لفتــــرة طــــويلــــة
الثانى:- مجهـــود شـــاق لفتــــرة قليلــــة





اى التغيرات الحادثة فى كل نوع أصلح ولماذا؟ هنعرف دلوقتى

طبعا اول ما تدخل الجيم بتسخن عادى جدا وتبدا تتمرن باوزانك الطبيعية اللى تقدر تشيلها وطبعا لما بتبدا تلعب هتلاقى نفسك بتنهج يعنى معدل ضربات القلب يزيد
وتحس ان التنفس مش مظبوط اوى زى ماهو انته متعود عليه فى الوضع العادى طبعا بيفضل الاحساس ده لفترة قصيرة لا تجاوز 10 دقائق


انته صح ده مش وهم ولا حاجة لا ده فعلا واقع لكن فى نفس الوقت هو مش حاجة تقلق لان ده الوضع الطبيعى للجسم
انته وانته داخل الجيم جسمك بيكون فى وضع عادى مفيش مجهود غير المجهود العادى وكل اجهزة الجسم شغالة بمعدلات طبيعية وبنسق معين



بمجرد تغير نوع المجهود متطلبات الجسم واحتياجاته بتزيد واول شىء بيتاثر بذلك هو القلب لانه هو مضخة الدم للجسم كذلك باقى الاجهزة معدلات عملها هتزيد زى الكلى والكبد والرئتين ودى اهمهم




عمر الاجهزة ما هتاخد النسق المطلوب بمجرد تعرض الجسم لتغير فى المجهود!!!! لا هتاخد وقت لحين احداث تناسق فى العمل واعادة حالة الاتزان للجسم من حيث انتاج الطاقة والتخلص من العوادم المتمثلة فى ثانى اكسيد الكربون وبخار الماء والبولينا الخ...............





بالنسبة للاول



اثناء الفترة اللازمة لحدوث التكيف بين اجهزة الجسم والتناسق بيزداد معدل التنفس زى ماشرحنا طب وبعد كده (لما يحدث تناسق يعنى)

معدل التنفس بيقل بدرجة ملحوظة وبيظل على نمط معين لفترة تسمى الفترة الثابتة والفترة اللازمة للوصول للفترة الثابتة بتكون حوالى 5 الى 10 دقائق

وهى دى اللى بتشعر فيها بالاجهاد نتيجة الزيادة فى معدلات عمل اجهزة الجسم المختلفة علشان كده التسخين والاحماء مهم قبل الدخول فى التمرين لمنع الشعور بالهبوط والاجهاد



طب ليه تمت تسمية الفترة دى بالفترة الثابتة؟ لان جسمك بينظم عمليات التنفس بمعدل ثابت من حيث تبادل الاكسجين وثانى اكسد الكربون من والى الدم بواسطة الرئتين




طب ايه هى التغيرات اللى بتحصل اثناء الفترة الثابتة؟

أ- تناقص معدل التنفس عما كان في الفترة الاولى من القيام بالمجهود البدني مع سهولة التنفس وعدم وجود ضيق فيه .
ب- تقل درجة استهلاك العضلات للاوكسجين .
ج- تقل وتنتظم نبضات القلب عما كانت عليه في الفترة الاولى من القيام بالمجهود البدني .
د- تصبح العضلات في حالة منتظمة ولا يتم الشعور باجهاد وتعب فى العضلات .

خير مثال على النوع الاول من المجهود هو الجرى لمسافات طويلة وبمجهود متوسط بتلاقى جسمك فى الاول قافش شوية وبيبتدى مع الوقت يزول هذا الشعور





بالنسبة للثاني




بيزداد فيه معدل التنفس ولا يعود الى معدله الطبيعي الا بعد فترة من انتهاء المجهود البدني (هنتكلم عليها كمان شوية)
السبب هو عدم القدرة على امداد الجسم بالاكسجين اللازم للقيام بهذا المجهود



وبناء على كده يقول الجسم بايجاد طرق جديدة لامداد العضلات بالاكسجين للوصول الى انتاج الطاقة المناسب لممارسة المجهود عالى الشدة ولفترة قصيرة (خد بالك من النقطة اللى فاتت دى)



وده علشان تعويض النقص فى امداد العضلات بالاكسجين والمحمل من الرئتين على مراكز التحميل فى الدم لجميع اجزاء الجسم عن طريق استهلاك الاكسجين المختزن فى العضلات!!!!!!

( ايوه فى اكسجين مختزن فى العضلات وما تستغربش ) العضلات الهيكلية يوجد فى تركيبها بروتين يسمى الميوجلوبين
البروتين ده بيختزن الاكسجين فى داخل العضلة لتوفيره لوقت الحاجة لانتاج الطاقة اللازمة لمجهود عالى الشدة (اقصى مجهود ممكن للشخص بذله) لفترة قصيرة (مده 9 ثوانى )



اذا لحد 9 ثوانئ بيكون نظام التنفس السائد هوائى ثم يسود النظام اللاهوائى (نظام حامض اللاكتيك ) لفترة وجيزة بعدها بيتوقف الرياضى نتيجة للشعور باجهاد عضلى ومش بتقدر تكمل على نفس المنوال

طيب ليه معدل التنفس مش بيرجع للوضع الطبيعى بعد انتهاء المجهود؟ لان الجسم استهلك الاكسجين المختزن فى العضلة بالتالى بيضطر لتعويض العضلة بالاكسجين ده مرة اخرى
ولذلك بيظل معدل التنفس عالى لحين تعويض ميوجلوبين العضلات بالاكسجين المستهلك استعداد لفترة اجهاد عالى الشدة مرة اخرى



الفترة مابعد انتهاء الاجهاد عالى الشدة واللى بيظل فيها معدل التنفس عالى بتتوقف على عاملين

أ‌- أقصى كمية اوكسجين متبادل بين الرئتين و الدم في الدقيقة
ب‌- أقصى كمية اكسجين يمكن لميوجلوبين العضلات اختزانها

العاملين دول قابلين للتحسن فى الجسم البشرى باستمرار ممارسة الرياضة



يعنى انته جسمك بعد فترة من الاستمرار فى التدريب ممكن توصل لشهر او اكتر اداء اجهزة الجسم المختلفة بيتحسن تحسن كبير مثلا كفاءة الجهاز التنفسى بتزداد



ايضا بتزداد كمية الاكسجين المتبادل بين الرئة والدم وباتالى يقل استخدام اكسجين العضلات للقيام بنشاط عالى الشدة لفترة قصيرة لمدة طويلة (يعنى واحد متعود يجرى كل يوم 10 ثوانى اسرنت جرى باقصى سرعة) اول يوم هيتعب تانى يوم هيقل التعب ثالث يوم تعب اقل وهكذا وده لان اداء الجهاز التنفسى تحسن وبناء عليه كل ما بيزيد التحسن كل ما يقل استخدام اكسجين العضلات ويقل تكون حامض اللاكتيك ويقل الشعور بالاجهاد

مش هو ده الى بيحصل اول مرة تدخل جيم وتخرج جسمك يكون مكسر وبتظل على كده لفترة كبيرة وبعد كده التمرين يكون عادى؟



كمان بيتحسن محتوى العضلات من الميوجلوبين يعنى تختزن العضلة اكسجين اكتر يعنى تقدر توفر امداد اكسجينى لمجهود عالى الشدة لفترة اطول (بدل ما كنت بتجرى 10 ثوانى اسبرنت بقيت تجرى 15 ثانية بدون تعب وبالاستمرار فى الرياضة يزداد التحسن وهكذا)



المجهود عالى الشدة مثال عليه التمرين فى الجيم وباوزان عالة او متوسطة لفترات قلية علما بان العلاقة عكسية كل ما بيزيد المجهود بتقل الفترة كذلك السباحة لانها بتستهلك انتاج الجسم لسعرات للحفاظ على درجة حرارة الجسم الطبيعية بالاضافة الطاقة الازمة لاداء المجهود البدنى والقيام بالسباحة



استخدام الجسم لاكسجين العضلات يتطلب زيادة الجهد البدنى بحيث يصل معدل استهلاك الاكسجين من الدم الى 55- 70 % اعتمادا على زيادة تركيز ثانى اكسيد الكربون فى مراكز الدم حتى الوصول الى ( النقطة الميتة)

لان الدم عليه مواقع تحميل الاكسجين وكذلك مواقع تحميل ثانى اكسيد الكربون فلما بيوصل تركيز ثانى اكسيد الكربون فى الدم على حساب الاكسجين لدرجة محددة يتحفز الجسم لاستهلاك اكسجين العضلة للابقاء على متطلبات عملية الاكسدة وانتاج الطاقة من الجلوكوز ثم الدهون.




طب اى النوعين افضل للجسم ولماذا؟

الاتنين ممتازين لكن كل واحد وليه دور
.اذا رجعنا للنظام الاول هنلاقى ان التنفس هوائى وهو بيعتمد على استخدام الاكسجين فى حرق الجلوكوز يعنى الكربوهيدرات ثم استخدام الدهون بعد نفاذ مخازن الكربوهيدرات ثم يتحول التنفس الى لا هوائى
.اذا رجعنا للنظام الثاني هنلاقى ان التنفس بيكون فى البداية هوائى ثم يتحول الى لا هوائى




الهوائى هو المسئول عن احتراق الدهون
اذا المراد والمطلوب دائما هو النظام الهوائى لكن فترة النظام الهوائى فى النظام الثانى قليلة جدا وفى النظام الاول كبيرة جدا



لذلك يتم الجمع بين النظامين فى نظام الجرى بنظام الفواصل وهو الامثل لحرق الدهون

جرى سريع اجهاد عالى لفترة قصيرة يليها فترة جرى خفيف يقل استهلاك الاكسجين بالاضافة لثبات معدل التنفس عند معدل عالى لامداد الجسم بالاكسجين المطلوب للحركة وكذلك تعويض النقص فى الاكسجين المستهلك من العضلات

ثم ينخفض معدل التنفس لانخفاض درجة الاجهاد عندها يتم الجرى مرة اخرى بنظام الجرى السريع (اجهاد عالى) لفترة اخرى يحدث فيها التغيرات المشروحة سابقا ثم جرى خفيف وهكذا






حقائق علمية عن التنفس


1- الانسان العادى بيتنفس تقريبا 15-20 مرة (يعنى بيقوم بعملية الشهيق والزفير) فى الوضع العادى وبتصل الى 40-50 مرة اثناء القيام بمجهود بدني

2- فى حالة الراحة الرئة بيمر فيها 10-18 لتر دم/دقيقة واثناء المجهود البدنى بيمر فيها 200 الى 230 لتر دم/ دقيقة

3- اثناء الراحة تمتص الانسجة العضلية 25% من الاكسجين المحمل على الدم والباقى يعود مرة اخرى فى الدم الوريدى الى القلب مرة اخرى



(الهواء هو عبارة عن خليط من الغازات بالنسب التالية النيتروجين حوالي 78% اي اربع اخماس الهواء , الاوكسجين حوالي 21% اي خمس الهواء, اما باقي الغازات تشكل حوالي 1% من الهواء وتضم : بخار الماء- ثاني اوكسيد الكربون- الهيدروجين- الهيليوم- اول اوكسيد الكربون وغازات اخرى.)


4- كفاءة الجهاز التنفسى (الرئتين) فى استخلاص الاكسجين فقط من الهواء الداخل مع الشهيق بتصل الى استخلاص 1 لتر اكسجين نقى مستخلص من 35 – 40 لتر هواء فى الاجهاد عالى الشدة لفترة قصيرة اما فى الوضع العاددى للاجهاد (اجهاد متوسط او قليل لفترة طويلة) بيكون 1 لتر اكسجين نقي مستخلص من 20- 25 لتر هواء.


5- احتياطى الجسم من الاكسجين يكون مختزن كالتالى (900 مللتر فى الرئتين) ( 1160 مللتر فى الدم) ( 600 مللتر فى العضلات)