¤۩۞۩¤للمتـزوجيـن مـن انجليزيـات ۝ اجـراءات الحصـول علـى تأشيـرة زوج لانجلتـرا¤۩۞۩¤

الزواج (الاقامة لمدة سنتين) للمملكة المتحدة فى المنتدى كله.

وأنصح المقبلين على الزواج من انجليزية يقروا مشاركتى اولا فى موضوع "اجراءات الزواج من أجنبية" عن خطوات الزواج بالتفصيل كما حدثت معى وهى المشاركة رقم 588 فى هذا الرابط http://dvd4arab.maktoob.com/showthre...337073&page=40

دلوقتى بقى اتحدث عن تجربتى بالتفصيل ولكن قبل اى حاجة احب ان أؤكد على نقطتين مهمين:

تجربتى الشخصية البحتة يعنى اللى هيكتب هنا مش معنا انه هو اللى هيحصل او لازم يحصل مع كل واحد..فكل حالة بتقدم اكيد فيها اختلاف عن الحالة الاخرى ولكن اغلب الظن انه تقريبا هيحتاج يلم نفس الورق اللى لميته عشان اقدمه للسفارة طبعا.

أخلاص النية لله ثم اخلاص النية لله ثم اخلاص النية لله،، واحب أكد انا لا واعظ ولا ملاك ولا شيخ مسجد بس انا شخصيا عندى احساس قوى ان الأخ اللى متجوز او ناوى يتجوز مراته باعتبار انها كوبرى لحياه افضل هيبقى بعيد جدا عن بركة ربنا سبحانه وتعالى وتوفيقه من وجهة نظرى المتواضعة فى أى امر من امور حياته والله سبحانه وتعالى اعلم.

اما بعد فى العموم خدها كده قاعدة بعد ما ربنا يتملك جوازتك على خير حاول متقمدش على طلب الفيزا مباشرة يعنى ادى لنفسك كده فرصة كام شهر لم فيهم ورقك براحتك وجهز نفسك كويس اوى لان مبدئيا كده فى اعتقادى الشخصى لو قدمت مباشرة بعد زواجك فى وزارة العدل السفارة هتنظر لطلبك بعين الشك على ان جوازك ملفق بغرض الحصول ع الفيزا ليس الا ثم طبعا الرفض لا قدر الله.

دلوقتى اتكلم ع الورق اللى قدمته وانا شخصيا قسمت كل الورق على أربعة اظرف،،رقمتهم وكتبت على كل ظرف الورق اللى فيه وهم...


1- الظرف الاول (كل المستندات التى تخص وتثبت علاقة مقدم الطلب بالاسبونسر او الزوجة الانجليزية):



* supporting letter وده عبارة عن جواب بتكتبه الزوجة او الاسبونسر بصفة عامة وبتشرح فيه ازاى علاقتكم ابتدت وتطورت للزواج وتفاصيل زياراتها ليك مثلا يعنى انها قابلت عيلتك وكده وقعدت فى الحته الفلانية وياريت لو تذكر ايه موانعها فى انها تقيم معاك فى بلدك يعنى مثلا عندها طفل فى المدرسة هناك او شغلها وكده وتوضح انها بتشتغل كذا فى بريطانيا ومأجرة او عندها بيت وانها شايفة ان دخلها وبيتها مناسب لتحملك لحين حصولك على فرصة عمل وبتوقع عادى طبعا من غير اختام او اى حاجة.

* قسيمة الزواج متوثقة من الشهر العقارى والخارجية أصل + ترجمة معتمدة + صورة.

* صور فوتوغرافية ليك وللمدام فى زياراتها ليك ومع العيلة ومتبخلش حط كل صورة تقدر تحطها وصور فرحك لو عملت فرح وانا شخصيا كمان زودت dvd حطيت فيها شوية فيديوهات من الفرح.

* اى حاجة تثبت علاقتكم من اول ما ابتدت ويفضل تكون حاجة بتاريخ ميقلش عن سنه ورا ودى بتتضمن فواتير تليفونها مثلا لو كانت بتكلمك,,ايميلات،،محادثات ع النت اى حاجة توريهم انكم ابتديتوا من زمان والموضوع كان عادى يعنى،،فى حالتنا المدام بعتتلى صورة من الارشيف بتاعها يثبت محادثتنا لسنه ورا وكمان طبعنالهم محادثات بشكل عشوائى بأيام مختلفة من شهور السنه دى.

* تذاكر الطيارة اللى تبين رحلتها لمصر (انا قدمت صورة للتذاكر مسحوبة ع السكانر).




2- الظرف الثانى (كل المستندات التى تخص الاسبونسر او الزوجة الانجليزية):



* صورة من جواز سفرها (صفحة البيانات وصفح التأشيرات وخصوصا الصفح اللى فيها تأشيرات زيارتها لمصر).

* كشف حساب أصل من البنك يبين حركة حسابها لمدة ست شهور سابقة ومش مهم تكون محوشة فلوس المهم انه يبان فيه مصاريفها وان كانت بتشتغل ومرتبها بيتحول عليه وكده.

* مفردات مرتب لمدة ست شهور سابقة (انا قدمت صور من مفردات مرتبها).

* اى حاجة تثبت هى بتشتغل ايه ان كانت بتشتغل (انا قدمت صور لعقد عملها).

* المكان اللى هتقيموا فيه ان كان ملكها أو مأجراه متفرقش،المهم انه مكان مناسب وبتدفع ايجارها بانتظام وميعتبرش زحمه (انا قدمت اصل بيوضح توصيف للمنزل اللى زوجتى مأجراه وعدد الغرف اللى فيه وانه مناسب لاربع اشخاص وكده وقدمت معاه صورة توضح تعاقدها مع الشركة اللى مأجرلها المنزل.

* لو المدام ليها حق فى اى اعفاءات ضريبية او مساعدات من الحكومة بأى شكل تقدم مايثبت وما تقلقش من الموضوع ده انه ممكن يخليهم يرفضوا الابلكيشن(اى مواطن انجليزى له حق فى المساعدات او الاعفاءات دى) المشكله هنا هى ان انتا اللى ملوش الحق،،،والموضوع ده ممكن يأثر عليك فى حالة ان كانت المدام مبتشتغلش خالص وكل اعتمادها على اعانة الحكومة (المهم انا قدمت الاصول اللى بتبين حقها فى الاعفاءات الضريبية + صور).




3- الظرف الثالث(كل المستندات التى تخص مقدم الطلب او طالب التأشيرة):



* شهادة ميلاد متوثقة من الخارجية + ترجمة معتمدة + صورة.

* انا مدرس رسم فى الأزهر فقدمت شهادة خبرة متوثقة من الخارجية اصل + ترجمة معتمدة + صورة.

* قدمت مفردات مرتب لشهرين من وظيفتى فى الأزهر اصل + ترجمة يدوية.

* انا كنت بشتغل فى مركز كورسات فنون للاطفال فجبت منهم ورقه مختومه انى بساهم كفنان تشكيلى فى المركز والمرتب اللى بخده كذا.

* كارنيه نقابة الفنانين التشكليين اللى يثبت انى عضو عامل فيه.

* صور فوتوغرافية لشغلى ومعارض وكده و ليا وانا بشتغل.

* كشف حساب ادخار بالانجليزى صادر من البنك الاهلى بمبلغ 6000 جنيه .

* فيش وتشبيه أصل موثق من الخارجية (انا جبت الفيش الجديد ده اللى ممكن تكتب فيه بالعربى والانجليزى فى نفس ومليته باللغتين لتوفير حق الترجمة.

* ايميلات بتوضح مراسلاتى لبعض الشركات والوكالات البريطانية للاستفسار عن العمل وردودهم عليا (وجهة النظر فى الحكاية دى انك تبينلهم انك مخطط انك تشتغل هناك ومش ناوى تقعد تقشر بصل فى البيت يعنى توريهم انك راجل جد فى البحث عن عمل وليك خطه واضحه للمستقبل والكلام ده يجرى على كل الورق اللى فوق مش مهم انتا بتاخد كاد من شغلك فى مصر قد مهو مهم انه يبان انك واحد بتاع شغل وكده).



4- الظرف الرابع (كل المستندات التى تخص الحالة المادية لاسرة مقدم الطلب):


والظرف ده بصراحة زيادة من عندى،،انا قدمته من وسوستى انى حاسس ان وضع زوجتى المادى ووضعى مش كفاية فرحت مكتب والدى واخويا الكبير اقرارات انهم بيتعهدوا بتحملى ماديا فى حالة انى احتجت وانهم بيشتغلوا كذا وانهم شايفين ان دخلهم مناسب لتحملى فى حالة الحاجة وانا مع مراتى فى بريطانيا،،وارفقت فيه صور بطايقهم وحساب لوالدى فى حدود 80000 جنيه + صورة لعقد تمليك محل وأرفقت ورق يثبت انى اخى معيد فى الجامعة وبيقبض كذا صورة من عقد تمليك شقته كل ده طبعا مع ترجمة معتمدة.


ملحوظة:


- كل الورق الاصلى اللى عايز تسترده ارفق معاه نسخ مصورة.

- كل الصور اللى ناوى تقدمها يفضل انها تكون مسحوبه على سكانر مش متصورة بمكنة تصوير مستندات خصوصا جواز سفر المدام.

- السفارة رجعتللى تقريبا كل الورق اللى أرفقته ومخدتش حاجة غير صورة جواز سفر المدام وصورة من ورق المنزل اللى مأجراه.


وبعد متخلص الليلة دى كلها تاخد الورق كله و بسبورك وصورتين على خلفية بيضا 4.5 فى 3.5 ومبلغ 5560 جنيه حق تأشيرة الزوج او (الاقامة المؤقتة لمده عامين) وطبعا الابلكيشن مكتمل وتطلع ع الورلدبريدج 3 ش ابو الفدا بالزمالك بس طبعا بعد متحجز ميعاد ع النت وتقدم،،عملية التقديم مش هتاخد نص ساعة ويمكن اقل لتبدأ رحلة الانتظار،،فى موقع الورلدبريدج بيقولوا ان النظر فى تأشيرة الزوج بتاخد من 3 أشهر الى 4 أشهر بس طبعا العملية بتختلف من حالة لاخرى كما فى تأشيرة السياحة او الدراسه بزبط،،انا الرد جالى بعد خمسين يوم من التقديم طبعا مقلوكوش كان انتظار مرهق للاعصاب لكن الحمد لله سبحانه وتعالى.