اغانى ومواويل من التراث الشعبى المصرى

اغانى ومواويل من الموروث الشعبى المصرى

لا يعرف من كتبها او دندنها

ولا زمانها ولكنها موجوده منذ اكثر من ثلاثمائه عام ومازلت متدواله



لما قالولى دة ولد انشد ضهرى واتسند
لما قالولى دة غلام انشد ضهرى واستقام
وكلونى البيض مقشر وعلية السمن عام


ولما قالولى بنية الحيطان مالت علية
وكلونى البيض بقشرة وبدال السمن مية




ما تفرحيش يام الولد بكرة مراتة تاخدة وتحرمك من جنية واللى يجيبة تاخدة

يجيب المشمش فى كمة ويحود بية عن اودة امة

خلية ولو يطلع قاسى ويضربنى ويفلق راسى
ويكب طبيخة فى الحارة ويقول دة فى امى خسارة

ولما قالوا دى بنية قلت الحبيبة جاية تكنس لى وتفرشلى وتسخن لى المية وتخدمنى




طلعت فوج السطوح السطح وجعنى
كسر دراعى اليمين والتانى يوجعنى
جالولى تاخدى ابن عمك
جلت لا والله
جالولى تاخدى ابن خالك
جلت حد الله
جالولى تاخدى الغريب حفضة باسم الله



البنت جالت لابوها جاك شوكة فى جدمك
كل البنات اتجوزت وانا بارعى فى غنمك

البنت جالت لابوها جاك شوكة فى ركبتك
كل البنات اتجوزت وانا جاعدة فى خلجتك




يا عروسة بيضتى الشاش
ياعروسة جوزك حشاش
شعرك حلتية ياعروسة لازم تلمية ياعروسة
وابو العروسة كان هنا من ساعة
ومعاة دواية من الدوا اللماعة
وابو العروسة كان هنا العصرية
ومعاة دواية من الدوا المصرية
يام العروسة كتر اللة خيرك
خدنا العروسة وجلعنا عينك
وابو العروسة ان كان جعان يتعشى
بنتك اصيلة نورت الفرشة
وابو العروسة انكان جعان ياجى ياكل
بنتك اصيلة نورت الحاصل



درج الحمام ع الكوم
ولا فيش جواز اليوم
كلو بعضكم يابنات
درج الحمام ع الجنا
ولا فيش جواز السنة
كلو بعضكم يا بنات
بلحك سوس يا عبدة
بيعة واتجوز ياعبدة
يا اسطى سيد سوج على طول

شارعنا ديج مافيهوش نور





يامة ويا لمة ويا لمية
بيتنى صاحية والدموع فى عينية
على اية بتضربنى وانا اسمى هانم
ومولعة الفونتار على السلالم
من يوم جوازى بيك ما شفت هنية
يا رايحين السوج جول لحمية موسى ضرب ست البنات روحية
يا دينى يامة الحليوة برة
يا دينى ديك رومى ياحبيبى ديك رومى
طلجنى وهات لى هدومى
وعوضى على الله
يادينى ديك بلدى يا حبيبى ديك بلدى
طلجنى وهات لى ولدى
وعوضى على الله




يا حمام العمدة ياحمام الغفير
واللى عندة واحدة سمينة يوديها للخراطين
واللى عندة واحدة رفيعة يوديها للعلافين
واللى معاة واحدة سودة يوديها للبياضين
واللى معاة واحدة بيضا يرمى عليها البشكير
تعالى تعالى يابيضا تعالى
مهر البيض غالى
مهرك ياصبية يتشال فى صوانى
آة يا بيضا آة يابيضا
ونشيلك شيل يا بيضا
ونحطك حط يا بيضا
ونخلى العازل يا بيضا
يتشال يتحط يا بيضا



وانا مالى انا لمل يخاصمنى سنة
البس لة بدلة بيضا واجلع لة بدلة بيضا
جلتلة رايحة الاوضة
جاللى مخاصمك سنة
البس لة بدلة بمبى واجلعلة بدلة بمبى
وملت لة على جنبى
جاللى مخاصمك سنة
البس لة بدلة كاكى واجلع لة بدلة بدلة كاكى وخدة على وراكى
جاللى مخاصمك سنة



سيرة

الاسم

مفتون الحرف والبيان

المؤهل العلمي

طالب في مدرسة الحياه التى لا مفر منها الا بالموت

حيث أعيش

في دار لا أمان لها

الهواية

النظر في كل ما يتعلق بالجمال من طبيعة حية ارتسمت بقدرة الخالق , بالنسبة لي منهج حياه وليست هواية

أعز الناس لي

أمي

انها الأنشودة العذبة على ثغر كل من كان بامه بار

أحبك يا أمي